С. Г. Чавайн лӱмеш калыкле книгагудышто у книга – «Курыкмарий кундемын ожсо жап гыч тӱҥалын кызытсе марте историй событий-влак хронологий». Тиде книга книгагудо директор И. В. Щегловалан курыкмарий тӱвырам да йӱлам аралаш тыршымылан, калыкын кидпаша пӧртшын базыжым пеҥгыдемдаш надырым пыштымылан пӧлеклалтын. Оҥай, шке шотан справочник-полшык курыкмарий историй нерген палдара. Книгам ямдылыше-влак Л. З. Кубеков ден Т. В. Петрова шке пашаштышт С. Г. Чавайн лӱмеш книгагудын шуэн вашлиялтше книга да рукопись пӧлкажлан эҥертеныт. Книга кок ужаш гыч шога. Икымше ужашыште курыкмарий кундемын ожсо жап гыч тӱҥалын кызытсе марте историй событий-влак ончыкталтыныт гын, кокымшо ужаш историй да тӱвыра верла дене палдара.

«Курыкмарий кундемын ожсо жап гыч тӱҥалын кызытсе марте историй событий-влак хронологий» книга самырык тукымым шочмо элым пагалаш да йӧраташ, тӱвыра, кугезе йӱлам аклаш туныкта.