Шергакан йолташ-влак! Ме таче марий калык модыш дене палдарымашнам умбакыже шуена.

Тиде модыш кажне икшывым теле жапыш кусара, кунам уремыште йӱштӧ, содор шокшо пӧртыш куржын пурыман, уке гын, Йӱштӧ Кугыза куча да кылмыктен шында.

Кумдыкым кум ужашлан шелман. Покшел кумдык тиде – урем, тушто куржталаш лиеш. Икымше да кумшо кумдык пӧртлан шотлалтыт, тушто пуйто – шокшо.

Покшел кумдыкышто Йӱштӧ Кугыза озалана, ик могыр пӧрт гыч вес могыр пӧртыш куржшо икшывым кучаш тырша.

Йоча-влак ик верыште шогышаш огытыл, нуно эре куржталшаш улыт.

Йӱштӧ Кугыза манеш:

– Толын Йӱшто Кугыза,

Вот оза гын, оза!

Йоча-шамычым куча,

Кылмыкта да кылмыкта!

Йоча-влак вашештат:

– Поро Йӱштӧ Кугызай,

Тый улат вет пешак сай,

Тыйым ме пагалена.

Колто мӧҥгышкӧ мемнам,

Итак кылмыкте капнам,

Чиена кугу ужгам!

Йоча-влак, икте почеш весе, покшел кумдыкыш куржын лектыт. Йӱштӧ Кугыза иктажым куча гын, садет верыштак «кылма» – тарваныде шога.

Тыгерак Йӱштӧ Кугызан чыла йочамат покшел кумдыкышто «кылмыктен» пытарымешкыже, модыш гӱжла.

Модса йолташда-влак дене, ешда дене пырля модса!