Тиште – тошто марий мут. Тудо иктаж-могай палым, тамгам ончыктен. Марла возыктыш кечымат тиште манаш пунчалме. Тамгам пушеҥгыш кÿзö дене сонарзе-влак, мландыш кольмо дене мланде пашаеҥ-влак пыштеныт, кажне суртын шке тамгаже лийын: тамга еш кугытым, тукым ойыртемым ончыктен, тыгак тамгам документыш подпись семын шынденыт, тувыр вачышкат тÿрленыт. Тиште кече – тиде мемнан ушнан, моштымашнан, возаш тунем шушо калыкын кушкын шумыжо. Возыктышна кужу корным эртен.

Республикыштына Марий тиште кече – Кугыжаныш пайрем тений ынде 19-ше гана палемдалтеш. С.Г. Чавайн лÿмеш калыкле книгагудо Марий тиште кечылан пӧлеклалтше пайремым теле тылзын 9-ше кечынже эртарен. Тиде кечын «Тамгам сÿретлена», «Каллиграфий», «Книга аксессуар» эртаралтыныт мастар-класс-влак, мурымаш да куштымаш пайремнам сöрастареныт. С. Чавайнын «Ото» почеламутшым тÿрло йылме дене лудмаш да моло оҥай площадке-влак пашам ыштеныт.

Фото с мероприятия.