27 апрельыште 15 шагатлан С. Г. Чавайн лӱмеш калыкле книгагудын краеведений пӧлкаштыже Юрий Исаковын «Йоҥгыдылык куат» книгажын презентацийже лиеш.

Юрий Валентинович Исаков  – марий серызе, почеламутчо, журналист, Марий Эл Республикын сулло журналистше. Тудо 1958 ий 20 апрельыште Морко район Кӱчыкэҥер ялыште шочын. Поэзий деке тудым «Ямде лий» газет шӱмаҥден, Кӱчыкэҥер тӱҥалтыш, Вончӱмбал кандашяиш, Октябрьский кыдалаш школлаште тунеммыж годым возымо почеламутшо-влак лач ты газетыште савыкталтыныт. Юрий Исаковын возымо почеламутшо-влак «Волгенче парча» (1981) тӱшка сборникыш пурталтыныт. Йоча-влаклан пӧлеклыме «Кугымӧр» почеламут аршаш 1986 ийыште, «Кандывуй каваште» поэма, почеламут книгаже 1989 ийыште летыныт.

«Йоҥгыдылык куат» – поэт Юрий Исаковын нылымше книгаже. Тиде иктыш чумырымо сборник. Авторын возаш тӱҥалмыж годсек могай произведенийже-влак лектыныт, тушечын сайжым тыш погымо. Тушто йочан тӱням ужын моштымыж гыч тӱҥалын, ялысе ӱдыр-рвезе-влакын, студент ешын, салтакын илышыштым, йӧратымашыштым, илыш нерген шӱм вургыж шонкалымашыштым почын ончыктымо.

Книгам Марий Эл Республикын «2013-2025 ийласе жаплан Марий Эл Республикын кугыжаныш национальный политикыже» кугыжаныш программыж почеш савыктыме.

Юрий Валентиновичын у книга пайремышкыже кумылан-влакым вучена.