20 апрельыште С. Г. Чавайн лӱмеш калыкле книгагудын конференц-залыштыже «Марий краевед» клубын черетан погынымашыже эртыш. Тудо писатель, педагог Шабдар Осыпын (Иосиф Архипович Шабдаровын) 125 ияш лӱмгечыжлан пӧлеклалте.

Шабдар Осыпын илыш да паша корныж нерген Марий кугыжаныш университетын историй да филологий факультетыште тунемше студент-влак презентацийым ончыктышт, писательын возымо почеламутшым йоҥгалтарышт. Марий кугыжаныш университетын доцентше, филологий наукын кандидатше Вера Никитьевна Бояринова марий сылнымутышто Шабдар Осыпын творчествыже кугу верым налын шогымыжым палемдыш, «Ӱдырамаш корно», «Вурс йӱк» произведенийлажым лончылыш.

Погынымашын кокымшо ужашыже У Торъял районысо Немда кыдалаш школын туныктышыжо Анатолий Меркурьевич Тереховлан пӧлеклалте, «С любовью к Родине» шарнымаш сборникын презентацийже лие. Книгалан материалым краевед Татьяна Иосифовна Елькина чумырен. Анатолий Меркурьевич сай туныктышо, тале организатор лийын. Немда школын туныктышыжо Людмила Арсентьевна Михайлова тудын дене пырля паша ыштыме жапым порын шарналтыш. Игорь Геннадьевич Попов ден Иван Никандрович Речкин туныктышын поро кумылжым да чон поянлыкшым палемдышт.

Тале туныктышо-писатель Шабдар Осып да уста краевед А. М. Терехов нерген шарнымаш калык чонышто эреак илаш тӱҥалеш.