13 апрельыште 15 шагатлан С. Г. Чавайн лӱмеш калыкле книгагудын конференц-залыштыже Советский районысо Кельмаксола кундемын чолга еҥже, краевед, шымлызе, мер пашаеҥ Леонид Никонорович Киртаевын «Юледур» книгажын презентацийже лиеш.

Леонид Никонорович фронтовик-земляк, тылыште тыршыше-влак нерген ятыр книган авторжо, Кельмаксоласе «Поиск» лӱман военно-патриотический группын вуйлатышыже улеш. Автор 45 ий наре шочмо кундемжын историйжым шымла, 14 книгам савыктен луктын, нунын кокла гыч кудытшо посна ял-влаклан пӧлеклалтыныт.

Марий кундемыштына кок Йӱледӱр уло. Иктыже – Советский, весыже – Кужэҥер районышто. У книга Советский районысо Йӱледӱр ялын эртыме корныжо нерген каласкала. Автор книгам савыкташлан Марий Эл Республикысе тӱрлӧ архивлаште улшо материалым шымлен, документ да фотографий-влакым поген, ялын историйже да калыкше нерген поян материалым чумырен. Тыгак книгашке сар да паша ветеран-влакын шарнымашыштым пуртен. Леонид Киртаев книгашкыже 1941-1945 ийласе Кугу Ачамланде сарыште кучедалше салтак-влак, сар жапыште колхоз пашаште, чодыраште неле пашам шуктен шогышо ӱдырамаш да йоча-влак нерген поян материалым чумырен.

Ты савыктышым Леонид Никонорович Йӱледӱр ялын 95 ияш лӱмгечыжлан пӧлеклен.

Леонид Никонорович Киртаев С. Г. Чавайн лӱмеш калыкле книгагудышто кумшо гана книга презентацийжым эртара. Автор кажне гана книгагудылан шке книгаже-влакым кумылын пӧлекла.  

«Юледур» книган презентацийышке кумылан-влакым пагален ӱжына!