Акций мучашлалтын, туге-гынат пӧлеклыше-влаклан книгагудо эреак почмо...

15.02.2023 | 292 просмотра(ов)

С. Г. Чавайн лӱмеш калыкле книгагудо Марий Эл Республикын Тӱвыра, печать да калык-влакын пашашт шотышто министерствыжын полшымыж дене «Йӧратыме книгагудетлан у книгам пӧлекле» республикысе акцийын пашажым кӱкшын аклаш лиеш, мом шонен пыштыме, тӱрыснек шукталтын! Акцийын тӱҥ шонымашыже – кызытсе саманыште вот технологий да электрон информаций ончылно кая гынат, книга ожнысо семынак эреак кӱлешан, шергакан пӧлеклан шотлалтеш. А книгагудыш пуымо книга-влакым ик-кок еҥ гына огыл, а икмыняр еҥ лудаш тӱҥалеш.

С. Г. Чавайн лӱмеш калыкле книгагудо кок арня жапыште у книга-влак дене толшо пӧлеклыше-влакым кумылын вашлийын. Акцийышке кажне кечын у деч у еҥ ушнен. Нунын коклаште книгагудо дене кылым кучышо да тыгодымак у йолташна-влак лийыныт.

Книгагудышто Пӧлеклышын кечыже 14 февральыште иктешлалтын. Ты кечын книга тӱня дене кылдалтше икмыняр площадке пашам ыштен.

Пӧлеклышын кечыже пайрем кышкарыште сӱретче-иллюстратор, книгагудын почётан лудшыжо, Российысе художник ушемын йыжъеҥже, Марий Эл Республикысе тӱвыран сулло пашаеҥже Мария Юрьевна Клюкина дене вашлиймаш эртен. Тыгак профессионал переплетчик Татьяна Ильинична Гусева республикысе книгагудо пашаеҥ-влаклан книга комым ачалымаш дене «Йӧратыме книгатлан кокымшо ӱмырым пӧлекле» мастар-классым ончыктен.

Книгагудышко толшо-влаклан пайрем кечын моткоч шуко ончер пашам ыштен. Эн тӱҥлан, мутат уке, «Книгагудылан – уло кумыл дене» ончер шотлалтын, республикысе акций жапыште пӧлеклыме книга-влак дене палымым ыштен.

Тӱнямбалысе книгам пӧлеклыме кечын, 14 февральыште, Марий Эл Республикын Тӱвыра, печать да калык-влакын пашашт шотышто министрже Константин Анатольевич Иванов, Йошкар-Олан мэрже Евгений Васильевич Маслов книгагудылан книга-влакым пӧлекленыт.

Пайрем кечын Калыкле книгагудо шкежат шуко жап книгагудо дене пеҥгыде кылым кучышо-влаклан пӧлекым кучыктен: В.М.Васильев лӱмеш йылмым, сылнымутым да историйым шымлыше марий институтлан, Семёновкысо школ-интернатлан, 1 номеран УФСИН СИЗО-лан.

Акцийышке моткоч шуко еҥ ушнен: Марий Эл правительстве председательын икымше алмаштышыже Михаил Зиновьевич Васютин, Марий Эл Республикысе правительстве председательын алмаштышыже Ольга Юрьевна Бадма-Халгаева, Марий Эл Республикын кугыжаныш погынжо, сомылшуктышо кучем орган, кугыжаныш учреждений, мер организаций-влак. Тыгак писатель, шанчызе, журналист, краевед, туныктышо, студент-влак лийыныт.

Пӧлеклыме книга коклаште сылнымутан литератур, историй да искусство дене книга, энциклопедий ден справочник-влак улыт. Автор-влакын кидпалым шындыман книгашт моткоч шерге пӧлеклан шотлалтыт.

«Йӧратыме книгагудетлан у книгам пӧлекле» республикысе акцийышке 855 пӧлеклыше ушнен, чылаже 4 268 книгам пӧлекленыт. Тышеч С. Г. Чавайн лӱмеш калыкле книгагудыш 72 пӧлеклыше толын, чылаже 911 савыктышым конденыт.

Пайрем поро, ласка кумыл дене эртен. Пӧлек-влак книга шӧрлыкым веле огыл пойдарат, тыгак лудаш йӧратыше-влаклан куаным кондаш тӱҥалыт. Книгагудыш коштса, книгам лудса, икте-весыланда пӧлеклен, куаным кондыза, поро кумылан лийза.

Mari