«Марий краевед» клублан – 35 ий

13.02.2023 | 301 просмотра(ов)

9 февральыште С. Г. Чавайн лӱмеш калыкле книгигудын конференц-залыштыже «Марий краевед» клубын черетан погынымашыже эртыш. 2023 ийыште клуб 35 ияш лӱмгечыжым палемдыш.

Клубын 130-шо погынымашыжым клубын председательже Алексей Максимович Клёнов почо. Книгагудын вуйлатышыже Ирина Витальевна Щеглова «Марий краевед» клубын краеведений пашам вияҥдымаште кугу надыржым палемдыш, краеведений пӧлкан пашаеҥже Светлана Евгеньевна Сауляк клубын шочмыжо да вияҥ толмо корныж нерген каласкалыш.

Тыгак мероприятийым краевед-влак шке пашашт дене куандарышт: Советский район гыч Леонид Никонорович Киртаев Кужеҥер районысо Юледур села нерген у книгаж дене палдарыш, журналист Александр Васильевич Илисавский Кокшамар школын туныктышыжо, агроном Пётр Кузьмич Костылевын илыш-корныж нерген докладым лудо.

Погынымашын кокымшо ужашыже Кужеҥер посёлок гыч краевед Зоя Александровна Кузнецован «Дедовы берега» лӱман кок томан книгажын презентацийжылан пӧлеклалте. Тиде пашам Зоя Александровна куд ий чумырен, Марий Эл Республикын кугыжаныш архивыште да вес регионласе архивлаште материалым чумырен, Кужеҥер районысо Оришуть ял нерген книгам луктын. Оришуть ял – йомшо ял. Автор ялын историйже да тушто илыше калык нерген поян материалым чумырен. «Дедовы берега» книгаш пурышо материалым ончал лекмеке, республике, шочмо эл нерген шуко уым пален налаш лиеш. Кызыт Зоя Александровна книган кумшо томжым лукташлан материалым чумыра.

«Марий краевед» клубым 35 ияш лӱмгечыж дене музыковед Олег Михайлович Герасимов, краевед Иван Аркадьевич Андреев, шымлызе-историк Ананий Герасимович Иванов да молат саламлышт.

Клуб шке пашажым умбакыже шуя. Кокымшо погынымаш апрель тылзыште лиеш, тудо Марий талешке кечылан да писатель, педагог Шабдар Осыпын 125 ияш лӱмгечыжлан пӧлеклалтеш.

«Марий краевед» клублан кужу ӱмырым, у вашлиймаш, презентаций да проект-влакым тыланен кодына! Клубнан пашашкыже самырык краевед да чыла кумылан-влакым ушнаш ӱжына!

Фотоальбом

Mari