8 декабрьыште 16 шагатлан С. Г. Чавайн лӱмеш калыкле книгагудын конференц-залыштыже  Марий тиште кечылан пӧлеклалтше «Марий краевед» клубын черетан погынымашыже лиеш. Марий Эл Республикыште Тиште кечым 10 декабрьыште пайремлат. Тиде кечын 1775-ше ийыште Санкт-Петербург оласе кевытлашке «Сочинения, принадлежащие к грамматике черемисского языка» лӱман икымше марий грамматикым ужалаш луктыныт. Тудым Озаҥысе архиепископ Вениамин Пуцек-Григорович чумырен да книга мучашке тӱжем утла мутан рушла-марла мутерым пуртен.

Марий тиште XVII курымыштак шочын. 1697 ийыште, Персийыш пӧртылшыжла, швед йылмым палыше финн Генрих Бреннер икымше гана 14 марий мутым колын да возен коден. Тыгак марий тиштын вияҥ толмыж нерген XVII-XVIII курымышто лекше рукопись ден савыктыме материал-влак ойлат.

Клубын погынымашыштыже филологий наукын кандидатше, В. М. Васильев лӱмеш Йылмым, сылнымутым да историйым шымлыше марий институтын кугурак шанче пашаеҥже Олег Арсентьевич Сергеевын кызытсе марий возыктышлан 325 ий темме нерген докладше лиеш. Тиде темылан тудын «Язык памятников письменности марийского языка (конец XVII-XVIII вв.)»  лӱман монографийже пӧлеклалтын.

Мероприятийыш туныктышо, краевед, шымлызе, студент-влакым ӱжмӧ. Кумылан-влак ушныза!