Мария Каликаевна Илибаева (1950-2020) – марий серызе, журналист, туныктышо, Россий писатель ушемын йыжыҥъеҥже (2000), Марий Эл Республикын калык писательже (2018).

Мария Илибаеван «Тиде ушдымо тӱняште» романже 2019 ийыште ош тӱням ужын. Романыште тӱҥ шотышто ял илыш да у саманыште яллан могай вер ойыралтме нерген каласкалалтеш. Илышын глобализаций йыжыҥыш куснымыж семын еҥ-влакын шӱм-чоныштышт, ушыштышт могай вашталтыш-влак эртымымат ужына.

Романыште шуко йодышым тарватыме: ялын тачысе илышыжым, тукым ден тукым кокласе кылым, йӱла дене кылдалтше шонымашым, но йошкар шӱртӧ семын содыки айдемын пӱртӱс дене сайын але осалын кылдалтын илымыжым, тыгак еҥ-влакын икте-весышт деке чытамсыррак лиймыштым ужына.

Автор ял темым ончыл верыш луктын, айдемын шӱм-чонжо вашталт толмо нерген ойлалтеш, образований темымат ӧрдыжеш кодымо огыл.

Романыште воспитаний теме деке моткоч лишне тукым ден тукым кокласе кыл шога. Илалше ийготан Оклиналан почешышт могай тукымын толмыжо садикте огыл: «Самырык-шамыч, те мемнан йӱланам шуйышо улыда, садлан ялнан, пӱртӱснан пӱрымашышт – тендан кидыште».

…Содыки тӱня йӧратымашлан да куанымашлан кӧра тӱзлана. Романыштат изи огыл вер йӧратымашлан ойыралтын. Автор тудым волгыдын, лавыра дене варыде ончыкта.

Иктешлен каласаш гын, Мария Илибаеван черетан романже лач тачысе саманын вӱршерже, манаш лиеш. Романым кызытсе илышым пӱсӧ шинча дене ужын да ончыкылык верч тургыжланымаш кумыл дене возымо.

Тиде книгам калыкле книгагудын краеведений пӧлкаштыже налын лудын кертыда.

Уверым краеведений пӧлкан библиотекарьже А.В. Иванова ямдылен