6 октябрьыште марий сылнымутын классикше Сергей Чавайнын шочмыжлан 129 ий темын

10.10.2017 | 1957 просмотра(ов)

Тиде кечын республикысе тӱҥ книгагудышто весела пайрем кумыл озаланен - Сергей Григорьевич Чавайнлан сылнымут пӧлемым почмо. Книгагудо тудын лӱмжым 35 ий нумалеш. 
Пайремыш шуко калык погынен. Ик эн шергакан уналан тудын уныкажым Сергей Юрьевич ден кугезе-кугезе Матвей уныкажым шотлыман. Шергакан мутмастарым поро шомак дене Марий Эл Республикын Правительстве Председательжын икымше алмаштышыже, тӱвыра, печать да калык паша шотышто министр Михаил Зиновьевич Васютин, тӱвыра министрын алмаштышыже Александр Михайлович Одинцов, Марий Эл Республикын Кугыжаныш погынжын пресс-секретарьже Александр Алексеевич Петров шарналтышт. Тыгак писатель, художник, журналист, тӱвыра да сымыктыш пашаеҥ-влак лийыныт. 

М. Щепкин лӱмеш кӱшыл театрал училищын выпускникше-влак, М. Шкетан лӱмеш марий кугыжаныш драме театрын самырык артистше-влак да Ю. В. Алексеев Чавайнын произведенийла гыч ужашым, шарнымашым лудыч гын, "Шокто, гармонь" йоча образцовый фольклор ансамбль «Морко куштымаш» дене куандарен, пайрем шӱлышым пуртышт. Нунылан чылаштланат кугу таум каласена. 
Тиддеч вара мутым С.Г.Чавайн лӱмеш калыкле книгагудын вуйлатышыже Ирина Витальевна Щеглова нале да «Ото» почеламутым чылан пырля, рӱж лудна. 
Тидын деч вара Сергей Григорьевичын бюстшо деке пеледыш аршашым пыштымеке, уна-влакым сылнымут пӧлемыш ӱжна. 
Тыште чылажат Чавайнын илыме да пашам ыштыме жапым шарныкта. Шӱштӧ диван, Сергей Григорьевичын паша верже – тошто ӱстел, книга шкаф, возымо, печатлыме машинке шке верыштым муыныт. Тыгак писатель да поэтын илышыже да творчествыже нерген сылнымутлам, илыме годсо материалым, архивысе документым, фото-влакым погымо. 
Сылнымут мастар шкенжым тӱрлӧ могырым почын пуэн, тудо - писатель, поэт, драматург, кусарыше, редактор да просветитель. 30 ий жапыште шӱдӧ утла почеламутым, поэмым, мурым, мыскарам, латкандаш пьесым, кумло наре ойлымашым, повестьым, очеркым, "Элнет" романным пӧлеклен. Руш писатель-влакын произведенийлаштым марий йылмыш кусарыме пашат виян каен шоген. Чавайн А.С. Пушкинын, Н. В. Гогольын, А. Н. Островскийын да молынат произведенийлаштым марий йылмыш кусарен. 
Тачысе кечылан Сергей Григорьевичын 49 савыктыме пашажым палемдыме. Книгагудыштына 46 савыктышым погымо. Тиде тӱшкаш 1920-1936 ийласе марий йылме дене возымо произведенийже-влак пурат. 
Сылнымут пӧлемын ик могыр пырдыжыштыже «Чавайнын лӱмжӧ калык чонышто" ужаш, тыште Чавайнын лӱмжым нумалше верлам фото дене вераҥдыме. Вес велым «Тукым пушеҥге» Сергей Григорьевичын илышыже, ешыже нерген палдара. 
Ончыкшым тиде сылне, йоҥгыдо Сергей Григорьевичын сылнымут пӧлемыштыже йоча, студент-влаклан, тыгак Марий Эл Республикыш вес кундемла гыч толшо турист-влаклан экскурсий, сылнымут кас, писатель да поэт-влак дене вашлиймаш-влак куандараш, эртаралташ тӱҥалыт. Кажне кумылан еҥым пагален ӱжына!

Mari