"Айдемын ӱмыржӧ кӱчык, а книга курымашлык", - манеш Марий Турек кундем гыч краевед Вера Александровна Сорокина.

С.Г. Чавайн лӱмеш книгагудын 2018 ийыште эртарыме «Идалыкын эн сай книгаже» конкурсышто «Книгагудо дене пеҥгыде кылым кучымаш» номинацийыште Марий Турек кундем гыч краевед Вера Александровна Сорокина лауреат лийын. Тудо изинекак книгам лудаш йӧратен, яра жапше годым книгагудыш куржталын. Варарак авам ончен, ӱдыржат книгам лудаш кумылаҥын, а кызыт уныкаже-влакат книга ден журналым лудаш йӧратат. Чынак, кузе изинекак йочам книгам лудаш кумылаҥдет, тугак умбакыже нуно тидлан утыр шӱмаҥыт.

Жап эртыме семын, Вера Александровна книгам возаш тӱҥалеш. А тидлан мо тудым таратен? Тудын могай да мыняр книгаже ош тӱням ужын? Тидын нерген пален налаш, лудшына-влак, мыланна «Марий Эл» газетыште савыкталтше материал полша.

В. А. Сорокина нерген ты пашам лудын лекмеке, куаныме, кугешныме кумыл чоным авалта. Вера Александровна, ончыкшымат паша лектышда тӱвыргӧ лийже!

Увертарымашым Книга палате пӧлкан пашаеҥже А.П. Пчёлкина ямдылен.