50 ийым темыме вашеш 2012-ше ийыште «Йӧрате мыйым! Йорате…» книгам лекте. Шым ият эртыш– весе уке… Вуйышто тынар ойлымаш «кия» – южгунам малаш возамат, шонет, чечас пыжалт лектыт…

Совестьше кӧргӧ гыч нулта: «Писатель лӱметым луктынат гын, мом яра киет. Возо, його! Шич да возо».

Возем, лудшо йолташ, тыланет возем.

Книгагудылан пӧлеклыме книга поснак шергакан. Шӱм-чон дене поро айдеме гына тыгай чапле ошкылым ышта – книгагудышко книгам конда.

С. Г. Чавайн лӱмеш калыкле книгагудышто книгам пӧлеклыме Тӱнямбал кечым пайремлыме лишан, пургыж тылзын 13-шо кечын, «Ямде лий» газет редакцийын директоржо-тӱҥ редакторжо Семенова Лидия Васильевна да пырля тыршыше пашаеҥышт дене моткоч оҥай вашлиймаш эртен. Пайремлыме кышкарыште тӱҥ пӧлек – Лидия Васильевнан кидпале дене пӧлеклыме «Сӱанлык тувыр» книга.

Семенова Лидия Васильевна – прозаик, журналист. Тудо Морко районын эн сылне Шеҥше селаштыже шочын-кушкын. Кыдалаш школышто устан тунемын. Школым пытарымек, 1980 – 1985 ийлаште Марий кугыжаныш университетын марий йылме да литератур пӧлкаштыже тунемын.

Лидия Васильевна «Ямде лий» газет редакцийын пионер илыш пӧлкажым вуйлатен, «Марий Эл учитель» журналын редакторжылан пашам ыштен, «Марий коммуна» газет редакцийыште тыршен. 2003 ий гыч тӱҥалын да таче марте «Ямде лий» газетын директор-тӱҥ редакторжылан пашам ышта. А возаш Лидия Семенова тунеммыж годымак тӱҥалын.

«Сӱанлык тувыр» книгашкыже ойлымаш да эссе-влак пурталтыныт. Автор ӱдырамашын пӱртӱс деч налме ныжылгылыкшым, торжа саманыштат яндар ура чонжым арален кодымыжым, пиал верч чон вургыжмыжым почын пуаш тырша. 2012-шо ийыште возымо «Йӧрате мыйым! Йӧрате…» книгаштыже йӧратымашын тӱрлӧ шӧрынжым почын ончыктен гын, тиде гана илыш сӱретым сылнымут произведенийыш савыра.

Книган кажне ластыкше мыйынат шинча ончылнем шочмо Шеҥше кундемыштем чарайолын модын куржталме йоча жапым, йӧратымаш вийым шижаш тӱҥалше самырык пагытым, поро пошкудо-влакым сӱретла… Да тыгай почеламут корныла шочыт:

Мыланем эн шерге, тый улат, ялем,

Куш ом кай, ом мие – пеленем ужнем.

Пеледалт, тӱзлане, волгыдым шавен,

Эн мотор, эн шерге, Шеҥше кундемем!