Теле тылзын 10-шо кечынже, Марий тиште пайремым палемдыме кышкарыште, Республикысе марий тӱвыра рӱдер «МУНЛО» кумшо уш-акыл марафоным эртарен. Тений тиде таҥасымашке индеш команде чумырген - Морко, Юлсер, Кужеҥер, У Торъял, Шернур, Мари Турек районла гыч да газет ден журнал редакцийлан пашаеҥышт. С.Г. Чавайн лӱмеш калыкле книгагудын «КнигаКудо» командыжат ты модмашке уло кумылын ушнен. Бердинов Д.А., Лебедева И.И., Миниахметова Л.И., Петрова Е.Г., Пчёлкина А.П. да Федорова А.К. шочмо йылме да сылнымут, марий калыкын илыш-йӱлаже да традицийже дене кылдалтше йодыш-влаклан ятыр чын вашмутым пуэныт.

Тыгак Марий тӱвыра форум жапыште С.Г. Чавайн лӱмеш калыкле книгагудын «Марий книга сандалык» ончерже у книга-влак дене палдарен.