Квест-модыш «Мый улам уныкаже Онарын…»

30.04.2019 | 1533 просмотра(ов)

Вӱдшор тылзын 25-ше кечынже С. Г. Чавайн лӱмеш калыкле книгагудын краеведений пӧлкаштыже Марий талешке кечылан пӧлеклалтше «Мый улам уныкаже Онарын …» марий йылме дене квест-модыш эртаралтын.

Тушто Йошкар-Оласе 14-ше номеран гимназийын 5-ше классыштыже тунемше-влак модыныт. Квестыш 19 йоча ушнен.

Квест-модыш 4 этап гыч шоген. Модыш тӱҥалтышыште тунемше-влак Онар патыр нерген легендым колыштыныт. Йоча-влак кок командылан шелалтын, «Онар мланде», «Сылнымут аршаш», «Тиште алан», «Родо-тукым тӱня» станцийла гоч корным эртеныт. Кажне вере нуным оҥай йодыш-влак вученыт. Нуно марий писатель-влакын лӱмышт, марий тиштын, родо-тукым кылын вияҥме корныжо дене палыме лийыныт. Кажне чын да раш вашмутлан да вес станцийышке куснашлан Марий Эл Республикын картшын ик ужашыжым, Онар патырын чиемжым але арвержым модын налыныт. Мучашлан тунемше-влак шке коклаштышт Онарын уныкажым ойыреныт. Модыш 1 шагат утла шуйнен.

Тиде квест йоча-влакын шӱм-чонешышт марий калыкын историйжым, йӱлажым палыме да пагалыме, талешкыже-влак дене кугешныме кумылым шочыктен манын, ӱшанен кодына.

Mari