Дьяков Иван Дмитриевич С. Г. Чавайн лӱмеш калыкле книгагудылан шкенжын возымо «Марий мландын киндыже» 250 экземпляр книгажым пӧлеклен.

2019 ий вӱдшор тылзын 13-шо кечынже республикын тӱҥ книгагудын конференц-залыштыже савыктышын презентацийже эртен.

Книган авторжо уло ӱмыржым Марий АССР - Марий Эл Республикын ялозанлыкшым вияҥдарен колтымылан пӧлеклен. Тудо Параньга, Шернур районласе ялозанлык органлаште, мланде пашам виктарыме шотышто Марий Эл Республикын комитетыштыже пашам ыштен. «За освоение Нечерноземья» медаль, Марий Эл Республикын Чап таныкше дене суапландаралтын.

Книгаште марий кундемысе мланде пашаеҥ-влакын пӱтынь элысе пашаче калык дене пырля  куштылго огыл корным эртымышт, тачысе тӱҥ задачышт да ончыкылык нерген  шонымашышт ончыкталтеш. Савыктыш рвезе тукым деке виктаралтын, вет ончыкшым самырык лудшо-влак марий мландын ончыкылык озашт лийын кертыт.

Фото-влакым республикысе краеведений тоштерын, В. Аскоченскийын да В. Воронцовын фондышт гыч кучылтмо.

Лудшыеҥ, тый изи годсек киндын тамжым пален кушкынат. Кугу пиал, кунам кажне кечын тыйын кочмо ӱстембалнет уржа, шыдаҥ кинде тамле пушым йырваш шара. Ямле шижмашым лукшо киндын неле, но кӱлешан корным эртымыж нерген тиде книга каласкала.

С. Г. Чавайн лӱмеш калыкле книгагудо Дьяков Иван Дмитриевичлан книга-влакым пӧлеклымыжлан кугу таум каласа.

Книга-влак республикын книгагудылашкыже колталтыт.