Шернур мландыште – Йыван Кырла лудмаш

17.04.2019 | 1514 просмотра(ов)

2019 ий вӱдшор тылзын 11-ше кечынже Шернур районысо каныме да тӱвыра рӱдерыште, 1-ше №-ан Шернур кыдалаш школышто кумдан палыме киноактёр да марий поэт Иванов Кирилл Ивановичын – Йыван Кырлан шочмыжлан 110 ий темме лӱмеш «Эртыше да кызытсе саманысе илыш, тӱвыра да туныктымо паша» темылан пӧлеклалтше VI Республик кӱкшытан «Йыван Кырла лудмаш» шанче-практике конференций эртен.

Пленарный заседаний деч ончыч конференцийын участникше-влакым В. М. Васильев лӱмеш йылмым, сылнымутым да историйым шымлыше марий институтын директоржо Евгений Петрович Кузьмин саламлен, Йыван Кырла лудмашын кӱлешлыкшым палемден.

Салам мутым тыгак Марий Эл Кугыжаныш Погын вуйлатышын алмаштышыже Анатолий Николаевич Иванов, Марий  Эл Правительстве председательын икымше алмаштышыже Михаил Зиновьевич Васютин лӱм дене Эдуард Валерьевич Чемышев, Мер Каҥаш председательын икымше алмаштышыже Валерий Александрович Мочаев да молат каласеныт.

Посна ойырымо еҥ-влак, марий калыкын лӱмлӧ эргыже Йыван Кырлам жаплен, поэтын шочмо Купсола ялысе шарнымаш кӱ да Марисоласе бюстшо   воктеке пеледыш аршашым пыштеныт.

Пленарный заседаний Шернур районысо каныме да тӱвыра рӱдерыште эртен. Тарватыме тӱҥ йодыш тыгай лийын: «Эртыше да кызытсе саманысе илыш, тӱвыра да туныктымо паша».  Пленарный заседанийыште Марий Эл Республикын тӱвыра, савыктыш, да калык паша шотышто министрже Константин Анатольевич Иванов «О современном состоянии и перспективах развития профессионального искусства в Республике Марий Эл», историй науко кандидат, доцент Родион Иванович Чузаев, Т. Евсеев лӱмеш калыкле тоштерын директоржо Светлана Владимировна Зверева «Аксиологический подход в этнокультурном проектировании: проблемное поле и опыт музейных учреждений Марий Эл», Марий туныктыш институтын пашаеҥже, филологий науко кандидат Елизавета Ивановна Игнатьева «Реализация ФГОС в части изучения родных языков: новые реалии», Марий Эл Республикын тӱвыра, савыктыш, да калык паша шотышто министрын алмаштышыже Александр Николаевич Луничкин «Региональная национально-культурная политика Республики Марий Эл на современном этапе» докладышт дене палдареныт.

Конференцийын кокымшо ужашыже 1-ше №-ан Шернур кыдалаш школышто шуйнен. Тыште 8 секций пашам ыштен. Участник-влак утларакшым кызытсе саманыште марий калыкын тӱвыражым арален кодымо, туныктымо паша, тӱвыра туризм, калык йӱла дене кылдалтше региональный да национальный  тӱвыра политикым авалтыше йодыш-влакым тарватеныт. Тидын шотышто шанчызе, краевед, туныктышо, тӱвыра пашаеҥ-влак шымлымаш ден шонымашыштым, темлымашыштым каласеныт. Чылаже секцийлаште 87 докладым колыштмо.

С. Г. Чавайн лӱмеш калыкле книгагудо «Электронное краеведение как средство продвижения краеведческих ресурсов Национальной библиотеки имени С. Г. Чавайна» лӱман докладым темлен. Тудын дене «Роль библиотек и музеев в приобщении населения к марийской истории и культуре» секцийыште книгагудын библиографше И. И. Лебедева палдарен.

Мучашлан А. Ф. Конаков лӱмеш тоштерыште уна-влаклан экскурсийым эртареныт.

Mari