«Театр – илышын воштончышыжо»

04.04.2019 | 1601 просмотра(ов)

2019 ий 8 апрельыште 16-00 шагатлан С. Г. Чавайн лӱмеш калыкле книгагудын конференц-залыштыже «Марий краевед» клубын 117-ше погынымашыже лиеш. Клуб Театр идалык да М. Шкетан лӱмеш Марий калыкле драме театрын 100 ияш лӱмгечыжлан пӧлеклалтеш.

2019 ий – Россий президент Владимир Путинын увертарымыж почеш Театр идалык. 13 декабрьыште Россий Федерацийысе чыла регионышто Театр идалыкым торжественно почыныт. Марий Элыште тиде пайрем Э. Сапаев лӱмеш опер да балет академический театрыште эртен. 

М. Шкетан лӱмеш калыкле драме театр – марий калыкын ик эн йӧратыме театрже. Театрлан негызым 1919 ийын пыштыме. Ноябрь тӱҥалтыште Озаҥ губернийысе калык туныктымо пӧлкан театр шотышто секцийже Царевококшайск кундемысе Ошламучаш ялын драма кружокшо негызеш «Марий калыкын икымше куснылшо театржым почмо нерген» пунчалым луктын. Тиде коллектив 29 ноябрьыште Сенькан ялысе школеш Тыныш Осыпын (И. А. Борисов) «Закон шумлык» пьесыж почеш икымше спектакльым модын ончыктен.

Театр тӱня шкем умылымаште кумда йӧным почеш. Ончаш толшо-влаклан у шонымашым шочыкташ, кумылым нӧлташ полша, элыштына да обществыште кугу вашталтышым ышташат шӱкалтышым ышта. Артист-влакын модмыштым ончен, нунын ден пырля ойгырена, шонена, нунын илышыштым илен лектына.

Клубын погынымашышкыже М. Шкетан лӱмеш калыкле драме театрын артистше, журналист, учёный, краевед, театровед, студент-влак погынат.

Пагален ӱжына!

 

Mari