12 сентябрьыште туныктышо, краевед, мер пашаеҥ, Марий Эл Республикысе тӱвыран сулло пашаеҥже Алексей Максимович Клёнов 65 ияш лӱмгечыжым палемда.

А. М. Клёнов У Торъял районысо Яраҥмучаш ялыште 1960 ий шочын. 1967–1971 ийлаште шочмо ялысе тӱҥалтыш школышто тунемеш, умбакыже пошкудо Шура кандашияш школышто шинчымашым налеш. Школым пытарымек, Оршанке педагогический училищыш тунемаш пура. 1979 ийыште, училищым пытарымек, Н.К. Крупская лӱмеш Марий кугыжаныш педагогический институтын студент ешышкыже ушна. Вич ий физико-математический факультетыште тыршен тунемеш да вузым йошкар диплом дене пытарымек, шочмо Шура школыш пӧртылеш. Самырык туныктышын тыршымыжым ужын, 1985 ийыште школ директорлан шогалтат. Ты пашам ныл ий шукта. Ты жапыштак ялысе клубышто художественный вуйлатыше сомылым шукта.

Умбакыже Алексей Максимович Оршанке педучилищыш кусна, ныл ий жапыште училище директорын воспитательный паша шотышто алмаштышыже марте кушкеш.

1993 ийыште А. М. Клёнов Йошкар-Олаш кусна да Марий образований институтышто пашам ышташ тӱҥалеш. Кок ий гыч, 1995 ий январьыште, Марий республикысе тӱвыра да сымыктыш колледжын вуйлатышыже лиеш. Лу ий гыч, ты тӧнежым И. С. Палантай лӱмеш Йошкар-Оласе музыкальный училище дене ушымеке, у лӱман колледжын директоржылан шогалеш. 2007 ийыште «Россий Федерацийын кыдалаш профессиональный образованийжын почётан пашаеҥже» знак, а 2014 ийыште «Марий Эл Республикысе тӱвыран сулло пашаеҥже» чаплӱм дене палемдалтеш.

Кызыт Алексей Максимович Марий Эл Республикысе Кугыжаныш архивын документ-влакым кучылтмо да савыктыме пӧлкан тӱҥ архивистшылан тырша.

2018 ийыште Алексей Максимович Клёнов С. Г. Чавайн лӱмеш калыкле книгагудо пелен ыштыше «Марий краевед» клубым вуйлаташ тӱҥалеш, ты сомылым уло кумылын шукта. 2020 ийыште тудлан книгагудын «Почетный читатель» чаплӱмым кучыктымо.

Алексей Максимовичым лӱмгечыж дене шокшын саламлена, тумо гай пеҥгыде тазалыкым, волгыдо шонымашым да сай паша лектышым тыланена!