Шергакан йолташ-влак! Ме таче марий калык модыш дене палдарымашнам умбакыже шуена.

Шотлеммут почеш пырысым ойырыман. Вӱдышӧ шотлаш тӱҥалеш:

– Коляиге ик эрден

Шурно пырчым муылден,

Сур мешакышке пыштен,

Мӧҥгышкыжӧ наҥгаен.

Коляиге изирак,

А мешакше нелырак.

Мом ышташ, кузе лияш,

Кузе пырчым нумалаш?

Каласыза, йоча-влак,

Сур мешак мо нелытан?

(С. Григорьева)

Йоча-влак ойлат:

– Вич кило!

Эше вич йочам шотлат, тудо пырыс лиеш. Молыжо коля-влак лийыт. Пырыс коля-влак деке лишемеш да йодеш:

– Кушко тыге миенда?

– Клатыш.

– Мом тушто ыштенда?

– Ӱйым кочкынна.

– Мыламже коденда дыр?

– Уке.

– Тугеже мый тендам кочкам.

– Ме шылына.

– Садак кучем.

– Утаралтса, коля-влак!

Коля-влак йырым-йыр куржын пытат. Пырыс покташ тӱҥалеш. Эн ондак кучымо икшыве пырыс лиеш. Модыш умбакыже шуйна.

Модса йолташда-влак дене, ешда дене пырля модса!

Вниманию читателей представляем список литературы по представленной теме из фонда Национальной библиотеки имени С. Г. Чавайна:

1. Китиков, А. Е. Марий калык модыш / А. Е. Китиков. – Йошкар-Ола, 1990. – 60 с.
2.  Марий калык модыш-влак = [Марийские народные игры] / С. Д. Архипова ямдылен. – Йошкар-Ола, 2012. – 111 с.
3. Марий калык ойпого : хрестоматий / В. Т. Михайлов ямд. – Йошкар-Ола, 2011. – 358 с.
4.  Марийские народные игры / составитель Архипова Светлана Дмитриевна. – Йошкар-Ола, 2020. – 119 с. : ил.
5. Михайлов, В. Т. Марий калык ойпого = [Устное народное творчество мари] : туныктымо пособий = [учебное пособие] / В. Т. Михайлов. – Йошкар-Ола , 2012. – 310 с.
6. Петухова А. Н. Детский фольклор народа мари / А. Н. Петухова. – Йошкар-Ола, 2004. – 288 с.

Материал подготовила Миниахметова Л. И., ведущий библиотекарь отдела социально-экономической литературы