Шергакан йолташ-влак, ме таче тендам «Тулвуй» лӱман модыш дене палдарена.

Модшо-влак, кажныже шкаланже мужырым муын, почела шогалыт. Шерева почеш икте орол лиеш. Оролжым тыгай шотлеммут почеш ойыраш лиеш:

Кайышым-кайышым – йыдалым муым.
Йыдалым Калийлан мый пуышым.
Калий мылам пурсам пуыш.
Пурсам комбылан пуышым.
Комбо мылам муным пуыш.
Муным коҥгаш пыштышым –
Муно шеле, томаша!
Тыланет покташ паша!

Шеҥгелне шогышо мужыр, молыштым эртен, ончыко куржеш. Орол, нуным поктен шуын, мужыр гыч иктыжым куча гын, тудын дене ончыко коктын шогалыт. Мужыр деч посна кодшо еҥ ынде орол лиеш.

Оролжо шеҥгеч куржын толмо кокла гыч иктыжымат кучен огеш шукто гын, куржшо-влак шке мужырышт дене кидым ваш кучен шуктат гын, нуным кучаш ок лий. Нуно коктынат ончыко шогалыт, а орол ончычсак кодеш.

Тыге модыш умбакыже шуйна.

Модса йолташда-влак дене, ешда дене пырля модса!