2018 ий 25 октябрьыште 16-00 шагатлан С. Г. Чавайн лӱмеш калыкле книгагудын конференц-залыштыже «Марий краевед» клубын черетан погынымашыже лиеш. Тудо Самырык-влакын коммунист ушемыштлан 100 ий теме лӱмеш пӧлеклалтеш.  Нунын икымше погынышт 1918 ий 29 октябрьыште почылтын. Лач тиде кече комсомолын шочмо датыжлан шотлалтеш.

Комсомол – тиде Самырык-влакын коммунистический ушемышт. Совет жапыште тудын радамыштыже чылан гаяк шогеныт, шуко поро пашам ыштеныт. Ончыч ушем РКСМ маналтын, вара ВЛКСМ лийын. Тиде кугу организаций нерген шарналтыме годым комсомол стройко, бригаде, студент отряд-влак ушыш толыт. Тиде ушем самырык-влакым пайдале да оҥай пашаш ушаш, осал койыш деч эрнаш, Шочмо элым, калыкым йӧраташ туныктен, коммунист партийын ончыкылык вуйлатышыже-влакым ямдылен… Чыла тидыже ӱдыр-рвезе-шамычлан илыш школ гай лийын.

1921 ий 16 майыште Краснококшайскыште Марий комсмолын икымше областной съездше почылтын. Тушто 49 ячейке гыч 85 делегат лийын. Лач икымше съезд Марий областьыште комсомол организацийым ыштыме пашам иктешлен, тудын вияҥме у пагытшылан негызым ыштен.

Клубын погынымашышкыже комсомолын ветеранже, шымлызе, краевед, студент-влак ушнат.

Пагален ӱжына!