Пагалыме йолташ-влак!

11.10.2018 | 1730 просмотра(ов)

Сергей Григорьевич Чавайнын 130 ияш лӱмгечыжлан пӧлеклалтше «Элнет» роман гыч ужаш-влакым лудына» акцийыш ушнаш ӱжына!

2018-ше ийыште С. Г. Чавайнлан 130 ий темеш. С. Г. Чавайн лӱмеш книгагудо «Сергей Чавайнын «Элнет» романже гыч ужаш-влакым лудына» медиа-проектым илышыш шыҥдара.

«Элнет» романын ужашыжым лудын, видеош войзен, книгагудын сайтышкыже колтыза!

Проектым иктешлымеке, «Сергей Чавайнын «Элнет» романже гыч ужаш-влакым лудына» лӱман видеоресурсым ыштена, книгагудын официальный сайтыштыже да социальный сетьыште вераҥдена!

С. Г. Чавайнын «Элнет» романже – марий литературын шӧртньӧ произведенийже. Тудын пӱрымашыже, автор семынак, куштылго лийын огыл. Романын икымше ужашыжым 1934-1935 ийлаште возымо да 1936 ийыште, Сергей Чавайнын илымыж годым, Москва олаште лукмо. «Элнет» романын кокымшо книгажым С. Г. Чавайн 1937 ий 8 апрельыште возен пытарен да Москваш колтен. Ты ийынак 25 майыште Сергей Григорьевичым арестоватленыт, калык тушманыш савыреныт да 11 ноябрьыште лӱен пуштыныт.

Писательын архив да рукописьшым йӱлалтеныт. Туге гынат, «Элнет» романын кокымшо ужаш ӱмбалне «Рукопись на цыганском языке» манын возымылан кӧра, шергакан рукопись илен кодын…

 

Возаш тӱҥалмек, писатель шке романжылан «Элнет» вуймутым пуэн. Тиде лӱм утларак келшыше лийын, молан манаш гын, чыла действий Элнет эҥер кундемыште эрта. 1936 ий тӱҥалтыште С. Г. Чавайн «Марийская правда» газетын лудшыжо-влаклан увертарен: «Кызыт мый кум ужашан «Элнет» романым возем. Тыште марий калыкын илышыже кузе вашталт толмым ончыктынем. Икымше ужаш 1911-1914 ийлам авалта; кокымшышто революций, граждан сар пагытым да НЭП саман тӱҥалмым почын пуэм; кумшо ужашын содержанийже – НЭП гыч тачысе кече марте».

 

С. Чавайнын «Элнет» романже мучашке шукталтде кодын гынат, тудо кызытат уло марий сылнымутышто ик эн чапле произведенийлан шотлалтеш. Лудмо годым ме шочмо йылмын юзо тӱняшкыже верештына, кугезына-влакын пайдаланыме сылне, сӧрал мутвундо дене шкенан шӱм-чоннам, уш-акылнам пойдарена, шкенан марий сыннам мыняр-гынат сайынрак, келгынрак умылаш тӱҥалына.

 

«Элнет» романым мемнан дене пырля лудса!

 

Ужашым лудаш кумылда уло гын, книгагудышко йыҥгыртен але возен колтен кертыда.

Проектыш ушнынеда, но видеом ышташ йӧнда уке гын, книгагудышкына толза, уло кумылын полшена.

 

Краеведений пӧлкан телефон номерже: (8362)56-60-27

e-mail: office_library@mail.ru

Mari