С. Г. Чавайн лӱмеш кугыжаныш книгагудын краеведений пӧлкаштыже

Марий калыкын чапланыше эргыже Сергей Алексеевич Черняковын

(1887-1938)  шочмыжлан 130 ий темме лӱмеш «Марий автономийын тӱҥалтыш ошкылжо» («У истоков марийской автономии») книга ончерым чумырымо. Книга ончер 20 сентябрь марте шуйна.

Пагален ӱжына!

Марий автономийым ыштыме моткоч кӱлешан пашаште Медведево район, Кӱшнур ялеш шочын-кушшо тале марий еҥын надырже – аклаш лийдыме.

Тачысе кӱкшыт гыч ончалаш гын, Сергей Алексеевич Черняков – шочмо калыкнан ик эн кугу талешкыже, патриот эргыже…

«Наркомнац пеленсе Марий отделым вуйлатымем годым марий калыкын автономийжым чоҥымо шотышто чумыр пашам мылам шукташ пернен». Тиде – автобиографий гыч ик ой. Шке нергенже тыге возышо еш чапле илыш корным эртен. Сергей Алексеевич Черняковлан кугу пиал логалын – марий автономий шочмо годым тудо В. И. Ленин дене вашлийын, МАО-м ыштыме нерген исторический декретым ямдылаш полшен.

С. А. Черняковым тиде сото пиалыш илыш корно конден.