16 декабрьыште С. Г. Чавайн лӱмеш калыкле книгагудын краеведений пӧлкаштыже «Марий краевед» клубын 125-ше погынымашыже эртыш. Тиде погынымаш Измаил Варсонофьевич Ефимовын 75 ияш лӱмгечыжлан пӧлеклалте.

Измаил Ефимов – Курыкмарий районысо Порандай ялын шочшыжо, Марий Эл Республикын да Россий Федерацийын сулло сӱретчыже, Марий Эл Республикын калык сӱретчыже, Марий АССР-ын Кугыжаныш премийын лауреатше. Живопись, геральдике да этнофутуризм направлений-влак дене пашам ышта. Тыгак тудо Россий Президент пелен пашам ыштыше геральдический комиссийын членже, Марий Эл Республикын 2011 ий марте улшо  герб да флагын авторжо.

Погынымашым клубын вуйлатышыже Алексей Максимович Клёнов почо, вара юбилярлан мутым пуыш. Измаил Варсонофьевич Марий Эл Республикысе Геральдический советыште пашам ыштыме жапым шарналтыш, республикын флаг да гербын историйже, у символикын шочмыж нерген каласкалыш.

Лӱмлӧ сӱретчым саламлаш писатель, художник, геральдист Евгений Владимирович Артеменко, Марий Эл Республикын сулло сӱретчыже Геннадий Владимирович Зыков, тыгак «Ончыко» да «У сем» журнал-влакын пашаеҥышт, краевед, журналист, студент-влак толыныт.

Тыгак клубын погынымашыштыже марий краевед-влакын пашаштым лончылымо, у книга, у автор-влакым палемдыме. У Торъял район гыч краевед Иван Фёдорович Шамаев, журналист, мер пашаеҥ Иван Аркадьевич Андреев да молат краеведений паша вияҥме нерген каласкалышт.

Клубын погынымашыже тиде ийлан пытартыш лийын. Вес погынымаш шушаш ийын февраль тылзыште лиеш. «Марий краевед» клубын пашашкыже ушнышо-влаклан кугу таум ойлена, чыла кумылан-влакым книгаудышто у погынымашышке вучена!

Материалым краеведений пӧлкан вуйлатышыже С. Е. Сауляк ямдылен.