20 ноябрьыште 14 шагатлан С. Г. Чавайн лӱмеш калыкле книгагудын конференц-залыштыже историк-краевед Леонид Никонорович Киртаев дене вашлиймаш лиеш.

Чолга краевед Л. Н. Киртаев Советский районысо Кельмаксола кундемыште илыше калыкын, ялын историйжым келгын шымла. Кугу Отечественный сарын участникше, паша ветеран-влак нерген 100 утла наре статьяже-влак республиканский да районысо газетлаште савыкталтыныт. Нуно самырык тукымым шочмо мландым йӧраташ да аралаш туныктат. Леонид Никонорович шуктен шогымо пашажлан шуко таумут да грамот, «Патриот России» медаль дене палемдалтын.

Шуко ий Леонид Никонорович Кельмаксола ялысе военно-патриотический, йомшо салтак-влакым кычалше «Поиск» лӱман группым вуйлата. Группын тыршымыжлан кӧра 40 утла наре салтакым мумо, чап лӱмыштым родо-тукымыштлан, шочмо эллан пӧртылтымӧ.

Леонид Киртаевын шуктен шогымо пашаже шочмо кундемжым чот йӧратымыжым ончыкта.

Вашлиймаште Л. Н. Киртаевын «Письма, опалённые войной» да «Кум лукан серыш» («Треугольные письма») книгаже-влакын презентацийже лиеш. Касыш краеведын родо-тукымжым, шочмо ял гыч уна-влакым, краевед, артист, радио да телевидений пашаеҥ-влакым ӱжмӧ.