2019 ий шыжа (октябрь)  тылзын 6-шо кечынже С.Г. Чавайн лӱмеш калыкле книгагудын «У старт. 55+» проектше негызеш Марий Элын пайремжылан пӧлеклалтше оҥай вашлиймаш эртыш. Уна-влакым Мосфильмыште марий артист-влак ден пырля сниматлыме «Кто сильнее его» кинофильм дене палдарыме. Фильмын сценарийжым мемнан землякна В. Обухов возен. 1983 ийыште тудым мемнан республикыште: Козьмодемьянскыште, Курык марий районышто, Юрино поселкышто войзымо. Тӱҥ рольым К. Сморигинас, В. Баринов, В. Ивашов да молат модыныт. Эмлызын ӱдыржӧ Юнай Морко кундемеш шочын кушшо Инна Иванова сниматлалтын. Фильмын режиссержо Автандил Квирикашвили марий кундемыште Совет властьын икымше ийлаштыже лийше событий-влакым: тунамсе милицийын пашажым, кукшо игече шогымылан кӧра шужен илымашым почын ончыктен. Тыгак тудо кумда зрительым калыкнан чон ойыртемже, марий калыкын пӱртӱс яндарлык ончылно вуйым савымыже,  йӱлаже дене палдарен.

Икымше гана тиде фильмым калыкыш лукмылан 35 ий эртен – тудым 1984 ий шыжа тылзын 22-шо кечынже Йошкар-Олаште «Октябрь» кинотеатырыште ончыктеныт.

Тӱҥалтыште кином ыштыме историй дене да Юнай рольым модшо Инна Иванова нерген тудын землякше-влак: Марий Эл Республикын сулло туныктыш пашаеҥже 6-шо №-ан Морко кыдалаш школын марий калыкын историйже предметым туныктышо Надежда Александровна Михайлова да 9-ше классыште тунемше Пантелеева Гита, Аптуллина Карина да Ралина оҥай презентацийым эртареныт.