2019 ий 31 октябрьыште 16 шагатлан С. Г. Чавайн лӱмеш калыкле книгагудын конференц-залыштыже «Марий краевед» клубын черетан 118-ше погынымашыже лиеш.

Тудо журналист, краевед, Марий Эл Республикын С. Г. Чавайн лÿмеш кугыжаныш премийын лауреатше, Марий АССР-ысе тÿвыран сулло пашаеҥже Гельсий Зайниевич Зайниевын 80 ияш лÿмгечыжлан пöлеклалтеш.

Гельсий Зайниевич Зайниев Пошкырт кундем Мишкан районысо Кульчубай ялеш шочын. Н. К. Крупская лÿмеш Марий кугыжаныш пединститутын историй-филологий факультетшым тунем пытарен. Журналист корныжо «Марий коммуна» газет гыч тÿҥалын. Тушто 23 ий утла тыршен. Корреспондент, тÿвыра, сымыктыш да сылнымут пöлкам вуйлатыше, ответственый секретарь, кусарыше лийын. Вара кум ий наре «Кече» журналыште тÿҥ редакторын алмаштышыжлан ыштен. 1993-2005 ийлаште – «Ончыко» журналысе пöлкан редакторжо.

Г.З. Зайниев – марий сылнымутын да сымыктышын лӱмлӧ еҥже-влакын биографийыштым шымлыше, 300 наре материалын авторжо (тушто марий сылнымут историйже почылтеш), С. Г. Чавайн лÿмеш калыкле книгагудын кажне ийын савыктыме «Календарь знаменательных и памятных дат «Марий Эл: время, события, люди» савыктышын чолга участникше.

Гельсий Зайниевич ик гана веле огыл «Марий Элын идалыкысе книгаже» конкурсын лауреатше лийын: 2006 ийыште – «Илыш муро» кнгигалан; 2012 ийыште – «Колымшо курым. Жап. Айдеме. Пӱрымаш» книгалан; 2016 ийыште – «Кӱрылтшӧ муро» книгалан; 2018 ийыште – «Шӱшпык ото : марий сылнымут тукым гыч тукымыш» книгалан.

Лÿмгече касыште Г. З. Зайниевын «Шӱм-чон воштончыш» лӱман у книгажын презентацийже лиеш. Тудо ты книгам калыкнан культур илышыштыже кугу пайрем – М. Шкетан лӱмеш Марий национальный театрын ик курымаш юбилейже вашеш ямдылен. Тышке пуртымо статья ден очерк-влак тӱрлӧ жапыште возалтыныт. Автор ӱшана: чумыр налмаште нуно Марий Эл дечат ончыч шочшо театрын оргажан да куанле савыртышан историйжым, драматург ден артист-влакын илыш корныштым да творчествыштым пален налаш мыняр-гынат полшен кертыт.

«Марий краевед» клубын погынымашышкыже шымлызе, краевед, этнограф, писатель, поэт, артист, студент-влакым ӱжмӧ.

Кумылан-влакым пагален ӱжына!