Газетлык статьялам писатель утларакше «Кыргори Сергей» лӱмпале дене печатлен. Тыгак «Чын марий», «Марий», «Зуда» да моло псевдонимым кучылтын, кокланже подпись олмеш ик буквам гына (Ч.) шынден. Газет пашаште улмыж годым Сергей Чавайн тӱрлӧ экшык ваштареш «шке семынже чот кучедалаш пиже, – возен 1935 ийыште В. Мухин-Сави. – Ме коктын Салтыков-Щедринын стиль дене «илыш порок-шамычым» поньыжаш тӱҥална. Перона йымач класс тушман тӱшка эре тӱжвак лектын шогыш. «Зуда» (Чавайнын псевдонимже) пеш шуко «едкий» статььям серыш».
«Юмо дечын ю патыр» - поэтын ош тӱням ужшо икымше почеламутшо, тудо 1908 ийлан ямдылыме «Марла календареш» «С. Ик-Эргы» подпись дене лектын. «Шӱшпык ден роза. Т. К-лан лӱмешыже» почеламут «С.» подпись дене «Йошкар кече» газетеш 1922 ий 11 июньышто савыкталтын. «Песня марийской девушки» почеламут «Марийская деревня» газетыште (1928 ий 8 март) савыкталтын. Тушто вуймут пелен «Из Чавайн С.» палемдалтын. «Колыбельная песня» койдарчык «Йэгрэс» (мӧҥгешлаже – Сергей) подпись дене тиде газетешак кок кече гыч, 10 мартыште, лектын. Тыгак «К.С.», «С. Ч.», «Ч. С.» инициал дене савыкталтын.

Кучылтмо литератур:

1. Куклин А. Имена Йошкар-Олинских улиц / А. Куклин // Марий Эл: вчера, сегодня, завтра. – Йошкар-Ола, 1995. - № 2. – С. 53-63.
2. Певец народа : воспоминания и документальные очерки о С. Г. Чавайне. – Йошкар-Ола : Марийс. кн. изд-во, 1988. – 198 с.
3. Чавайн // Васин К. К. Псевдонимы марийский литераторов : краткий историко-литературный справочник / К. К. Васин. – Йошкар-Ола, 1965. – С. 54.
4. Чоткар патыр. Сергей Чавайн: палыме да палыдыме : почеламут, поэме, пьесе, статья, шарнымаш / Г. З. Зайниев ямд. – Йошкар-Ола : Марий кн. савыктыш, 2013. – 239 с.