Дорогие читатели! Предлагаем вам познакомиться с новинками марийской художественной литературы:

Дудина З. Юмынӱдыр огеш пу вашмутым: поэзий книга / Зоя Дудина. – Йошкар-Ола, 2021. – 209 с.

Поэт Зоя Дудина у книгаштыже пытартыш ийлаште возымыжым шергалаш темла. Тошто гыч «Мый тымык отышко толам» циклым гына пуртен. Лишыл да мӱндыр эл, тӱнясе пуламыр, мер калыкын пӱрымашыже, посна айдемын чон азапше – чылажат авторым тургыжландара.

Соколова-Озамбай Л. Пелганде йӱд: поэме, муро да почеламут-влак / Людмила Соколова-Озамбай. – Йошкар-Ола, 2020. – 160 с.

Авторын сборникышкыже «Шочмо Шашке кундемем» поэме, муро ден почеламут-влак пуреныт.

Самырык ме улына: «Кеҥеж сылнымутчо» семинарысе автор-влакын почеламутышт, ойлымашышт, очерк. – Йошкар-Ола, 2021. – 131 с.

Самырык автор-влакын сылнымут пӱрымашышт тӱрлын чоҥалтеш. Нунын коклаште В. Гордеева, В. Матвеев, Р. Сунгурова, Т. Япаева-Токтарова шке лудшыштым муыныт гын, Д. Веденькин, Н. Ильина, Х. Александрова, В. Матвеева, А. Михайлова, О. Мошкина нунын деке икымше ошкылым веле ыштат.

Золотарёв Н. Малем, ӧндалын пиалем: почеламут аршаш / Николай Золотарёв. – Йошкар-Ола, 2021. – 190 с.

Тиде почеламут аршаш – авторын кокымшо книгаже. Поэт марий йылмын мут поянлыкшым моштен, шонен кучылтеш, ятыр ий туныктымо пашаште погымо усталыкше шижалтеш.

Иванова-Ильина Н. Кидыштем – сирень пеледыш: поэме, почеламут ден муро-влак / Надежда Иванова-Ильина. – Йошкар-Ола, 2020. – 184 с.

Авторын сборникышкыже «Ӱшан тул» поэме, почеламут ден муро-влак пуреныт.

Сент-Экзюпери А. Изи принц = [Маленький принц] / Антуан де Сент-Экзюпери; марий йылмыш Геннадий Сабанцев кусарен. – Neckarseinach, 2021. – 96 с.

Изилянова В. Пеледышем-влак: почеламут аршаш / Валентина Изилянова. – Йошкар-Ола, 2021. – 55 с.

Пеледыш – авторын илыш метафоржо, сынже. Тудым поэтессе шке икшывыжла шижеш. Пеледышыже-влак тӱрлӧ улыт: садыште, пасушто кушшо, олыкысо, чодырасе, эсогыл шонен лукмо пеледыш-влакат: мурпеледыш, шинчавӱдпеледыш, йӧратымашпеледыш…

Почеламут-влак тӱрлӧ жапыште возалтыныт, но ик аршашыште эшеат моторын да волгыдын койыт.

Ильина Н. Рышт-рошт ошкылына: физкультминутко-влак / Надежда Ильина. – Йошкар-Ола, 2021. – 56 с.

Шабалин К. Порсын шовыч: пьесе-влак / Капитон Шабалин. – Йошкар-Ола, 2021. – 92 с.

Книган авторжо Шабалин Капитон Николаевич 1936 ийыште У Торъял район Кӱшыл Оръю ялеш шочын. Усталык чонан автор, сулен налме канышыш лекмекше, шке шонымашыжым, шӱм-чон тургыжланымашыжым сылнымут корнылашке пышташ тӱҥалын. Але марте вич книгам луктын, тиде – «Ӱмыр орлаҥге» (2005), «Тура сер» (2006), «Тора каче», «Вӧдыр кугыза» (2008), «Шарнымаш саска» (2011), «Оръеҥ сынан Оръю кундем» (2021). Ты мутпогыш К. Н. Шабалин пьесе-влакым чумырен.

Бердинский И. Мый шочым. Жап ыле сӧрале…: почеламут-влак / Иван Бердинский; [Г. А. Смирнова чумырен]. – Йошкар-Ола, 2021. – 192 с.

Ӱмыр лугыч лийше поэт Иван Бердинскийын тиде книгашкыже тӱрлӧ темылан возымо  почеламут аршашым пуртымо.

Висвис З. Шӱмбел Ӱшӱт воктене: почеламут ден муро-влак / Зоя Висвис. – Йошкар-Ола, 2021. – 70 с.

Автор сборникышкыже пытартыш жапыште возымо почеламутшо-влакым, йоҥгышо икмыняр муро шомакым чумырен.

Материал подготовила заведующая отделом краеведения С. Е. Сауляк.