С.Г. Чавайн лӱмеш калыкле книгагудылан «Кугарня» газетын пашаеҥже, самырык поэтессе Н. А. Моисеева  «Лышташ велалтме годым» 300 наре экземпляр книгам пӧлеклен. Савыктышым Финляндийысе М.А. Кастрен ушемын полшымыж дене лукмо.

Финн-угор тӱшкаш пурышо кажне калыкын сылнымутшо шкешотан. Тидыже сборникыш пурышо почеламутла гоч раш палдырна. Ойпогышко Российыште, Венгрийыште, Финляндийыште, Эстонийыште илыше финн-угор поэт-шамычын почеламутыштым чумырымо. Нине сылнымутчо-влакын мутсаскаштышт тӱҥ теме-влак икгайрак улыт – шочмо элын, калыкын ончыкылыкышт верч тургыжланымаш, пӱртӱсым моктымаш, ача-авам йӧратымаш.

Йӱдвелысе финн-угор калык-влакын (хант, манси, саам) сылнымутышт фольклор да калык йӱла дене чак кылдалтын. Марий йылмышке нуным Россий писатель ушемын еҥже, марий сылнымут тӱняште кумдан палыме поэт, кусарыше Альберт Васильев кусарен. Редакторын сомылжым Надежда Эмыкан шуктен. Уло кумылын автор ден редакторым у сылнымут саскашт да икымше тыгай кугу пашашт дене саламлена, у тӱвыргӧ лектышым тыланена.

Лышташ велалтме годым : финн-угор поэзий – марла / [проектын авторышт : В. Н. Козлов, Н. А. Моисеева] ; Альберт Васильев кусарен ; ончылмут Надежда Моисееван. – Йошкар-Ола : "Газета "Кугарня", 2020. – 178 с. ; 21 см. – 500 экз.

Уверым Книга палате пӧлкан тӱҥ библиографше А.П. Пчёлкина ямдылен.