Шочмо мланде деч вийым налын…

18.02.2020 | 1500 просмотра(ов)

13 февральыште С. Г. Чавайн лӱмеш калыкле книгагудын конференц-залыштыже «Марий краевед» клубын 120-шо погынымашыже эртыш. Тудо кумдан палыме марий шымлызе, туныктышо, мер пашаеҥ, историй шанче доктор, профессор, Россий Федерацийысе кӱшыл школын сулло пашаеҥже Ксенофонт Никанорович Сануковын 85 ияш лӱмгечыжлан да Марий Эл республикын 100 ияш юбилейжылан пӧлеклалте.

Клубын председательже Алексей Максимович Клёнов погынымашым юбиляр-влакым саламлымаш гыч тӱҥале. Тений 75 ияш лӱмгечым Марий Эл республикысе тӱвыран сулло пашаеҥже Мария Байрамовна Матукова палемдыш. Тыгак январь тылзыште книгагудын пашаеҥже, историй наукын кандидатше Василий Геннадьевич Востриков 60 ийым темыш.

Марий кугыжаныш университетын историко-филологический факультетшын деканже Алексей Григорьевич Ошаев икымше докладым лудо. Тудо марий автономийын шочмын кӱлешлыкше нерген каласкалыш. Ксенофонт Никаноровичын биографий сынан книга-влакше дене палдарыш. Историй наукын кандидатше Сергей Константинович Свечников К. Н. Сануковын шымлыме школжо нерген ойлыш. Тыгак учёныйын аспирантше-влакан пашашт дене палымым ыштыш.

Умбакыже почётан уна, Марий Эл республикысе Кугыжаныш погынын депутатше, Марий Эл республикысе наукын заслуженный деятельже, шымлызе-философ Александр Витальевич Маслихин мутым нале. Тудо уна-влакым республикын юбилейже дене саламлыш, марий автономийын исторйыштыже эн тӱҥ да кӱлешан этап-влакым палемдыш.

Клубыш Марий кугыжаныш университетын студентше, шымлызе-историк, краевед, туныктышо, мер пашаеҥ-влак погыненыт ыле.

 

Материалым краеведений пӧлкан вуйлатышыже Светлана Евгеньевна Сауляк ямдылен.

Mari