2019 ий теле (декабрь) тылзын 17-ше кечынже С.Г. Чавайн лӱмеш калыкле книгагудын «У старт. 55+» проектше негызеш марий кундемнан сылне да кумдан палыме верлажым ужын кошташ кумылан илалше-влак дене М. Шкетан лӱмеш театрыш экскурсий дене мийышна.

Марий театр – марий йылмым, культурым арален кодымо ик эн кӱлешан вер. Шукерте огыл, кылме (ноябрь) тылзын 29-ше кечынже М. Шкетан лӱмеш Марий национальный драме театр 100 ияш лӱмгечыжым палемдыш. Тиде жапыште театр пашаеҥ-влак кугу сомылым ыштен толыныт. Калыклан, театрыш толын спектакльым але концертым куанен ончаш манын, чыла ышташ тыршат. Ме, ончышо-влак, рольыштлан келыштарен оҥайын чийыше артист-влакым ужына. А кӧ тиде вургемым да моло декорацийым ямдылен шога? Сцена да занавес шеҥгелне мо ышталтеш, чыла тидым шке шинча дене ужаш пеш оҥай.

Лӱмгече вашеш кугыжаныш могыр гыч полыш ойыралтын. Театрыште уэмден олмыктымо паша ышталтын. Могай вашталтыш лиймымат ме шекланен шуктышна. Мемнам Марий Эл Республикын  сулло артисткыже Мочалова Елена Геннадьевна пеш порын вашлие да уло кумылын театр мучко чыла цехлам ончыктен каласкален пуыш. Столярный цехыште ыштыше мастар кузе сурт-пече макет ямдылымым ончыктыш. Тӱрлӧ вургемым йӧнештарыме, марий тӱрым ургымо машина ден тӱрлышӧ мастар-влакын пашаштымат ужынна. Кумдан палыме марий кундемын калык артист Юрий Рязанцевын ӱдыржӧ Елена Юрьевна Йӱштӧ кугызалан пондашым ямдыла ыле. Артист-влаклан кузе гримым мастар-влак пыштат, ӱпымат чал тӱсыш кузе савырат, ме шке шинча денак ужна да ыштенат ончышна. Сценыш ончалмеке, ӧрынна –  ончымо залже сцена деч изиракын коеш улмаш?! Елена Геннадьевна театрын кӧргысӧ илышыж гыч шуко моло «секретымат» умылтарен пуыш. Мыланна чылажат пеш келшен. Кугу тау! Уло кумылын театрыш спектакльымат, концертымат ончаш коштына да кошташ тӱҥалына.

М. Шкетан лӱмеш национальный драме театрын 100 ияш лӱмгечыже да шушаш У ий пайрем дене чыла пашаеҥыштымат саламлена да умбакыжат ончышо калык деке кумылаҥын, нуным уло чон ден пагален пашам ышташ чыла сайым тыланена! Пашада тыгак тӱвыргӧ лийже!