С. Г. Чавайнын поэзийже волгыдо шижмашан, илышым йӧраташ кумылаҥдыше. Марий поэтын кажне почеламут корныжо оптимизм шӱлыш дене шӱла. Шабдар Осып каласен: «Чавайн илышым пеш йӧрата, тудын поэзийже – илыш нерген куанен мурымо муро».

С. Чавайн "Кече, кече манмет дене…"

Кече, кече манмет дене…

Кече, кече манмет дене

Чевер кечылан мо шуэш?

Тылзе, тылзе манмет дене

У тылзылан мо шуэш?

Шӱдыр, шӱдыр манмет дене

Чолга шӱдырлан мо шуэш?

Эл-мланде манмет дене

Марий эллан мо шуэш?

Тӱржӧ уке чодрана уло,

Кутко виса янлыкна уло,

Мӱй деч тутло саскана уло,

Шинчавӱд гай вӱдна уло.

Калык, калык манмет дене

Марий калыклан мо шуэш?

Патыр деч патыр пӧръеҥна уло,

Чевер деч чевер ӱдрамашна уло,

Ушан деч ушан ончыл еҥна уло,

Пеледыш гай икшывына уло.

1926 ий